काठमाडौं, असार १६। मनसुन सुरु भएसँगै देशका विभिन्न जिल्लामा सर्पदंशका घटना बढ्न थालेपछि पहाडी तथा हिमाली क्षेत्रका अस्पतालहरूले एन्टिभेनम (सर्पको विषविरुद्धको औषधि) को अभाव भएको बताएका छन्। पर्याप्त औषधि नहुँदा केही स्वास्थ्य संस्थाले बिरामीलाई अन्य अस्पतालमा रेफर गर्नुपरेको अवस्था रहेको स्वास्थ्यकर्मीहरूले बताएका छन्।
स्वास्थ्य तथा जनसंख्या मन्त्रालयअन्तर्गतका अधिकारीहरूले आवश्यकताअनुसार बढी मौज्दात भएका उपचार केन्द्रबाट कम मौज्दात भएका अस्पतालमा एन्टिभेनम पठाउने काम भइरहेको बताएका छन्। मनसुनको समयमा सर्पदंशका घटना बढ्ने भएकाले सबै उपचार केन्द्रमा औषधिको उपलब्धता सुनिश्चित गर्न प्रयास भइरहेको जनाइएको छ।
स्वास्थ्य विज्ञहरूले सर्पले टोकेपछि झारफुक वा घरेलु उपचारमा समय खर्च नगरी तत्काल सर्पदंश उपचार सेवा उपलब्ध भएको नजिकको स्वास्थ्य संस्थामा पुग्न आग्रह गरेका छन्। समयमै उपचार पाए अधिकांश बिरामीको ज्यान बचाउन सकिने उनीहरूको भनाइ छ।
