भोटेकोशी बाढीको ११औँ दिन चिनियाँ नागरिकको जीवितै उद्धार
भोटेकोशी बाढीको ११औँ दिन चिनियाँ नागरिकको जीवितै उद्धार
रसुवा । भोटेकोशी नदीमा आएको विनाशकारी बाढीपछि रसुवाको माथिल्लो त्रिशूली–१ जलविद्युत् आयोजनाको सुरुङभित्र फसेका एक चिनियाँ नागरिकलाई ११औँ दिनमा जीवितै उद्धार गरिएको छ।
नेपाली सेनाका अनुसार बाढीपछि आयोजनाको अडिट–४ सुरुङभित्र फसेका चिनियाँ नागरिकलाई शनिबार उद्धार गरिएको हो। उद्धारका क्रममा नेपाली सेनाको टोलीलाई दक्षिण कोरियाबाट आएको विपद् उद्धार विशेषज्ञ टोलीले सहयोग गरेको थियो।
उद्धार गरिएका चिनियाँ नागरिकलाई प्रारम्भिक उपचार तथा थप स्वास्थ्य परीक्षणका लागि नुवाकोटस्थित त्रिशूलीको मैथिली ब्यारेकतर्फ लगिएको थियो।
अन्तर्राष्ट्रिय समाचार संस्था रोयटर्सका अनुसार उद्धार गरिएका व्यक्तिको नाम लु हाइताओ हो। उनी माथिल्लो त्रिशूली–१ आयोजनाको करिब २२५ मिटर लामो सुरुङभित्र फसेका थिए। उद्धारपछि उनको अवस्था स्थिर रहेको र शरीरमा गम्भीर चोटपटक नदेखिए पनि सामान्य हाइपोथर्मिया (शरीरको तापक्रम घट्ने अवस्था) देखिएको बताइएको छ।
बाढीका कारण सुरुङभित्र फसेका व्यक्तिको खोजीका क्रममा यसअघि पनि दुई नेपाली श्रमिकलाई जीवितै उद्धार गरिएको थियो। उनीहरूलाई अघिल्लो दिन माथिल्लो त्रिशूली–३ ‘ए’ जलविद्युत् आयोजनाको सुरुङबाट उद्धार गरिएको थियो। चिनियाँ नागरिकको उद्धारसँगै बाढीपछि विभिन्न जलविद्युत् आयोजनाका सुरुङबाट जीवितै उद्धार हुनेको संख्या तीन पुगेको छ।
भोटेकोशी क्षेत्रमा आएको बाढीले रसुवा, नुवाकोटलगायतका क्षेत्रमा ठूलो मानवीय तथा भौतिक क्षति पुर्याएको छ। जलविद्युत् आयोजनाका सुरुङ तथा अन्य संरचनामा ठूलो परिमाणमा माटो, ढुंगा र बाढीको मलबा जमेकाले बेपत्ताको खोजी तथा उद्धार कार्य निकै चुनौतीपूर्ण बनेको छ।
उद्धार टोलीहरूले माथिल्लो त्रिशूली–१ सहित विभिन्न जलविद्युत् आयोजनाका सुरुङमा खोजीलाई निरन्तरता दिइरहेका छन्। नेपाली सेना, नेपाल प्रहरी, सशस्त्र प्रहरी तथा विदेशी विपद् उद्धार विशेषज्ञ टोलीहरू समेत खोज तथा उद्धार अभियानमा संलग्न छन्।
बाढीको ११औँ दिनमा सुरुङबाट एक चिनियाँ नागरिक जीवितै भेटिनुले अझै सम्पर्कविहीन तथा सुरुङभित्र फसेका व्यक्तिहरूको उद्धार हुने आशा बढाएको छ। उद्धार अभियान भने जोखिमपूर्ण अवस्थाबीच निरन्तर जारी छ।
